మరో పేరు మార్పుకు ట్రంప్ యత్నం.. ఈసారి హ‌ర్మూజ్ జలసంధి వంతు!

అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలతో వార్తల్లో నిలిచారు. ఇరాన్‌తో తీవ్ర ఉద్రిక్తతలు, యుద్ధ వాతావరణం కొనసాగుతున్న వేళ, వ్యూహాత్మకంగా అత్యంత కీలకమైన హ‌ర్మూజ్ జలసంధి పేరును 'ట్రంప్ స్ట్రెయిట్'గా మార్చాలని ఆయన ప్రతిపాదించారు. ఈ మేరకు తన సోషల్ మీడియా నెట్‌వర్క్ 'ట్రూత్ సోషల్'లో ఆయన ఒక పోస్ట్ చేశారు. ఇది అంతర్జాతీయంగా కొత్త చర్చకు దారితీసింది.

"ఇప్పుడు హ‌ర్మూజ్ జలసంధి యూఎస్ఏ నియంత్రణలో ఉంది కదా, మనం దాని పేరును 'ట్రంప్ స్ట్రెయిట్'గా మార్చేద్దామా? అమెరికా లాగే ఇది కూడా మునుపెన్నడూ లేనంత 'హాటర్'గా ఉంటుంది!" అని ట్రంప్ తన పోస్ట్‌లో పేర్కొన్నారు. ప్రస్తుతం ఈ జలమార్గంపై తమకే పూర్తి సార్వభౌమాధికారం ఉందని ఆయన ఇటీవలి వారాల్లో పదేపదే చెబుతున్నారు. అంతేకాకుండా దీనిని 'కొత్త అమెరికా భూభాగం'గా చూపిస్తూ ఒక మ్యాప్‌ను కూడా పోస్ట్ చేయడం గమనార్హం.

అయితే, ట్రంప్ చెబుతున్నట్లుగా ఈ జలసంధి అమెరికా నియంత్రణలో లేదు. ఫిబ్రవరి చివరిలో అమెరికా, ఇజ్రాయెల్ కలిసి ఇరాన్‌పై యుద్ధం ప్రారంభించినందుకు ప్రతీకారంగా ఇరాన్ ఈ జలసంధిని పూర్తిగా మూసివేసింది. ప్రపంచంలోని ఐదో వంతు చమురు రవాణా ఈ మార్గం గుండానే సాగుతుంది. ఇరాన్ కొత్తగా సముద్రంలో మైన్‌లు అమర్చుతోందని ఆరోపిస్తూ అమెరికా దళాలు మంగళవారం ఈ ప్రాంతంలో కొత్తగా దాడులు ప్రారంభించాయి. ఈ పరిణామాలతో అంతర్జాతీయ మార్కెట్‌లో చమురు ధరలు మరోసారి పెరిగాయి.

ట్రంప్ ఇలా భౌగోళిక ప్రాంతాల పేర్లు మార్చడం ఇదే మొదటిసారి కాదు. గత వారం కెనడాతో వాణిజ్య యుద్ధం నేపథ్యంలో ఒంటారియో సరస్సు పేరును 'లేక్ అమెరికా'గా మార్చారు. 2025 జనవరిలో రెండోసారి అధ్యక్షుడిగా బాధ్యతలు చేపట్టిన మొదటి రోజే గల్ఫ్ ఆఫ్ మెక్సికోను 'గల్ఫ్ ఆఫ్ అమెరికా'గా మార్చి ఉత్తర్వులు జారీ చేశారు. 80 ఏళ్ల ట్రంప్ మొదట సరదాగా, హాస్యంగా ఇలాంటి వ్యాఖ్యలు చేసినా, ఆ తర్వాత వాటిని నిజం చేయడం ఆయనకు అలవాటుగా మారిందని రాజకీయ విశ్లేషకులు గుర్తుచేస్తున్నారు. ఇప్పుడు హ‌ర్మూజ్ విషయంలో ఆయన ప్రతిపాదన కూడా తీవ్ర పరిణామాలకు దారితీయవచ్చని ఆందోళన వ్యక్తం చేస్తున్నారు.